واحد دخل مسجد في أمريكا، وكان شايل في إيده ساطور... لقى الإمام واقف ومعاه مجموعة من المسلمين... بص لهم وقال: عايز واحد مسلم!
الناس بصوا لبعض واستغربوا... فزعق فيهم وقال: قلت لكم عايز واحد مسلم...
واحد منهم اتشجّع وقال له: أنا مسلم، عايز إيه؟
قال له: تعالى معايه...
وخرجوا من المسجد... وصلوا لغاية شارع قريب، قال له الراجل صاحب الساطور: تعرف تدبح لي الخروف ده على الطريقة الإسلامية؟
قال له المسلم: أيوه أعرف.
وخد منه الساطور ودبح الخروف... فسأله صاحب الساطور: تعرف تسلخه؟
قال له المسلم: لا، ماعرفش في السلخ والله.
قام الراجل واخد الساطور (وعليه الدم) ورايح المسجد وقال: أنا عايز واحد مسلم.
الناس شافوا الدم خافوا وفضلوا يبصوا لبعض... وبعدين عينيهم اتجمّعت على الإمام وواحد منهم شاور عليه، فالإمام قال وهو مرعوب: إيه يا جدعان؟! هو يعني عشان صليت بيكم ركعتين بقيت مسلم؟؟؟
6 comments:
سلام عليكم
أنا مستغربة الحقيقة اني أول واحدة هكتب تعليق!! لأن فكرة البلوج عاجباني... و نكتة اللي عايز مسلم دي جامدة أوي و تضحك بجد
حقيقي حقيقي أتمنى لحضرتك التوفيق على البلوجز الجميلة دي... و أكيد التوفيق في حياتك عموما بأة
متشكر قوي على ذوقك
يا رب البوستات كلها تعجبك .. ويا رب تعجبك الجايات أكتر
جامدددددده
محمود علي
شكرا يا جميل ويا رب الجايات تعجبك
كل سنة وانت طيب
معلش انا مش عاجبانى النكتة دى خالص
يا ريت نبعد عن الدين
عبده محتاس
كل سنة وانت طيب
أنا متشكر أولا إنك سيبت تعليق
ثانيا ... لو بصيت للعنوان بتاع المدونة ... هتلاقي إني كاتب إن النكت نوع من التنقيس لا التهييس ... وصدقني أنا لو حسيت إنها أصابت الدين .. ما كنتش هأحطها هنا ... لأني ضد ده مبدئيا ... وثانيا عندي حد أدنى من الدين اللي يمنعني من ده
لكن النكتة لو بصيت للي جواها بجد ... هتلاقيها بتتريق علينا .. لأننا ماعندناش مبدأ ولا حتى في الدين ..
بنتخلى عن مبادئنا وحتى دينا لما بنتحط في المحك ...(وده ظهر لما الشيخ قال انه مش مسلم لما لقى الخطر جايله من الناحية دي ) ...
يعني من الآخر .. إحنا عايزين نكون في الصفوف الأمامية (الامامة) في كل المجالات دين وسياسة وغيره ... لكن عند الفعل الحقيقي .. بنتخلى عن القيادة وعن الامامة ... وبنسيبها للمؤمنين بمبادئهم بجد (وده طبعا لما بتكون الامامة أو القيادة حمل تقيل أو محفوفة بالمخاطر)
هو ده اللي أنا فهمته من النكته ... وصدقني ما شفتش ولا شايف فيها لحد دلوقتي أي مساس بالدين
شكرا على زيارتك للمدونة
نورتني ويا ريت تنورني مرة تانية
وكل سنة وانت طيب
Post a Comment